10期-教學滋養站-A級的感動

                                    A級的感動    文/新竹市東區三民國小 林淑美老師             

   秋分到，苦揀仔舅欉開滿黃色的花蕊，風一吹飄落陣陣黃金雨！規逝黃色的地毯沿著運動埕迵到辦公室，體貼阮連绁講一工課的疲勞。綠葉、黃花、水紅仔色的結果、咖啡色的種子，一年四季的變化，苦揀仔舅身上看著大自然送予咱性命感動。

   頂一回感動佇當時，你敢猶會記？是提著學位奢颺少年時，抑是佮初戀愛人結連理？是手抱孩兒做爸母的歡喜，抑是看著囝兒領獎目箍紅記記？因為感動予咱佇人生每一個崁站有滿滿的記持。若準感動會當分級？你會按準分？欲分幾級咧？若共分做A、B、C三級，上懸的A級，你欲共排佇佗位？我想，我的學生仔今年的歇熱送予我的，是A級滿滿的感動佮學習。

   「老師：當時知影成績？」、「著啊！我足緊張的呢！」、「嘿啊！毋知會過關袂？予人等足久的呢！」阮這陣「i台語」社團的囡仔，有影是毋捌做過大家嚓嚓趒，自開學到今，便若路裡相搪頭開喙頭一句，毋是共老師相借問，顛倒是關心歇熱去參加教育部的閩南語認證考試有過關–無？予我這个𤆬in去考試的老師若啉著梅子酒咧，心內酸甘甜仔、酸甘甜。酸的是這陣囡仔干焦關心考試的成績，攏袂記得是啥人佮in對700字開始學起；甘甜的是原來台語的種子佇這囡仔身上開始發穎！

   是啥機緣予我𤆬這陣市內囡仔去考台語咧？這就愛對阮研究所講起。今年是我讀碩士班的第二冬，讀論文、寫報告共我的365工貼甲滇滇，雖罔無閒𩑾𩑾，不而過心內真享受這落日時做老師教囡仔，暝時做學生予老師教的快樂。我常在共研究所學著新的想法、教學方式紮轉去學校，揣囡仔做白鳥鼠來試驗。毋過，有一層代誌予我蓋困擾，就是寫論文。教授講若欲畢業就愛準備研究的主題，教冊、讀冊攏好參詳，謼！若講著欲做學術性的論文就規身軀礙虐、礙虐，這予我頭殼𢯾咧燒。想想咧！我干焦會曉教台語，目前『桌遊』閣衝甲掠袂牢。1īng ko𤆬囡仔來耍台語、學台語，應該是行會通啦！今想起來，hiáng時凡勢食著好膽藥仔，若無就是青盲毋驚槍，想講若有滿腹的熱情，拄著困難總是有貴人來相伨，規去共跙落去做就著啊！

   這个決定對今年的三月舞到十月半冬貼貼，到今猶無才調收山。拄開始為著欲吸引囡仔來耍，四界去研習學看有啥好耍的遊戲會當囥入去教學內底。绁落來做拼音的字卡：母音、子音、雙母音、三母音、入聲、鼻化音，一睏去文具店共格仔頂十幾盒的字卡掃共空空空，𢯾轉去寫甲手強欲扭著，按爾閣無到氣。700个漢字隨字ûn條仔拍、印出來、欱塑膠膜仔，閣一字一字鉸。彼塑膠片四个角尖uì uì驚會共囡仔鑿著，一張一張共修予圓tau，舞幾偌暝日連辦公室的同事嘛看袂過心，鉸刀攑咧提來鬥跤手，若工廠的生產線咧。當當第尾仔張完成的時，辦公室內底歡喜甲親像得樂透，雄雄有人喝聲：「阿一組是欲按怎耍咧？」著謼！我哪會這賊頭！唉！繼續衝落去，來！700字閣做一擺！

      就按爾，這陣英語比台語較勥的市內囡仔，綴著有滿腹熱情，不而過兩光兩光閣想欲緊畢業的老師，開始進入台語漢字閣拼音的奇妙學習旅程。

   拄開始教音標的時，囡仔tu tu問：「老師你教英語怪怪哦！佮阮學的攏無siāng？」 我對喙應講：「憨囡仔，這是咱台語的拼音，親像恁咧學華語的注音仝款啦！」雄雄頭殼閃過一個想法，華語、台語、英語攏有某一部分欲倚欲倚，用囡仔會當理解的方法來試看覓咧！ìng sín對「音標心臟病」開始，規疊音標ke-tsi-phang囥中央，四、五個囡仔圍做伙，對看著「a」念「ㄝ」、「i」念「ㄞ」

手蹄仔予人拍甲紅kòng kòng，到會曉教同學認捌腹肚大的是「a」；瘦抽瘦抽的是「i」，規間教室hì hè 叫。毋甘看in耍甲手掌頭仔腫甲若麵龜咧欲喝停，in煞姑情講：「老師，拜託咧！閣耍一擺，我一定會贏的！」這聲搬戲的欲煞，看戲的煞毋願走呢！

   耍含唇音的時教in看著「m」若去速食店麥當勞食馬鈴薯糋，愛共喙唇含予牢咧，物件才袂予落–出來！這陣囡仔目tsiu金金相，頭頕咧、頕咧，這落表情是聽有抑聽無？我嘛教了虛虛呢！紹介入聲「p」的時，雄雄阿嘉攑手講：「老師，我知這親像咧lîm維他露p，喙嘛愛合予峇汽水才袂流甲規四界，著無？」阿茹隨應講：「hooh！就像咱頂改耍的麥當勞「m」同款的意思啊，你上課是有認真聽無？」看in二个一句來一句去咧答喙鼓，其他的囡仔嘛彼落到今你才知的表情，我咧臆聽有的凡勢有八成的款。

   進入漢字，這陣囡仔若孔子眼有開。教著「躼跤」阿淳就講：「身軀足長的意思著無？因為人攏教阮阿爸躼跤的。」我共比一個讚，阿淳歡喜甲喙笑目笑。講到「龜毛」這個詞，課本紹介意思是做人無夠阿莎力、歹鬥陣；阿彥挲著頭殼，憢疑憢疑講：「毋過，我共冊桌仔款甲真清氣，阿母哪會講我龜毛咧？」阿璇：「講！你是無是款點外鐘久。」阿彥笑咧笑咧頕頭：「你哪會知？」，「因為阮阿母嘛念我真龜毛呀，就親像龜欲生毛，愛足久足久的啦！」阿璇lo̍k-sōng lo̍k-sōng笑咧講。全班笑講這是「龜毛」的新解說，生活經驗的語言免紹介in就自然會感受。

   規半冬台語課耍欲煞，歡喜是歡喜，不而過就是敢若減一個收尾。「學台語，欲創啥？恁耍煞，囡仔學著啥？」翁婿一句話共我拍驚醒。是傳承母語抑是保存文化？囡仔是我實驗的白鳥鼠抑是完成學位的祭品？我予問甲喙仔開開無才調應。頭殼內浮出：「𤆬囡仔去參加台語認證」，毋過我敢有法度？聽講按爾會真僫畢業呢！翁婿的話閣共我扭轉來現實，「欲家長認同就用實力證明，台語毋是耍耍的就煞。成功抑失敗攏毋要緊，論文寫會出來–無嘛免驚，上重要的是囡仔佇老師的身上學著啥？知識、態度抑是學習的過程。」這句話佇我耳仔邊踅仔踅、踅仔踅。無做袂按怎，做落凡勢無同款。「好！咱來去參加國家級的考試，恁考A級，老師考C級，若有過關閣有麥當勞通食。」阮和囡仔約束照品照行。

   鳳凰花開，ki-le的歌聲陪阮佇電腦教室練習一擺閣一擺，愛聽、愛講、愛讀、愛寫，語言的功夫盡展。聽、讀無啥問題，寫的部分勉強會過關，毋過「講」就頭較大身囉！頭一擺錄音，人問講：「你想欲飼狗，欲按怎共厝裡的人講咧？」逐家講甲inn inn tū tū，時間未到就自動消音。囡仔真鬱卒，我嘛無知欲怎樣。好佳哉！吊舌筋講話大舌的阿薇佇這條應了袂䆀，我共放送予逐家聽。伊講：「阿母，你逐工攏足無閒，無人陪我，我足孤單，敢會使予我飼狗仔，我會好好照顧伊，𤆬伊去放屎尿，閣共拭尻川，拜託拜託啦！」同學聽著原來愛按爾講，袂輸食著大力丸咧，規个學習的氣勢閣猛起來！顛倒是阿薇，若準伊的大舌會予同學笑，無想著伊是全班「口說」的老師。

   認證考試的時間愈來愈倚，六年仔的阿妤二工攏無來上課，我想講若無欲參加嘛要共老師講。氣怫怫拖咧魯電話欲張人，敲幾偌通in阿母的手機仔攏無人接，落尾聯絡著煞是in阿姨，阿姨那會那講：「老師真歹勢！阿妤應該袂去上課囉！in規家伙仔去𨑨迌，啥知佇高速公路予pōng輪的車挵著，in阿母當場就過往去囉！今當咧辦後事。」親像予雷公槓著的感覺，哪會按爾？無想著彼暝阿妤用line共我講，「老師！阿母頭七做煞我會去上課，我欲考予阿母看，我一定會過關。」我共應好鼓勵伊好好照顧家己，全班攏會等伊！line的這頭，早就目屎四淋垂，毋甘阿妤失去老母的疼痛，閣較佩服伊比大人面對性命無常的勇氣。

   八月十二，認證考試的日子。這陣囡仔佮in的序大人頭一擺看著台語考試正式的場面。原來，國家是這呢爾重視，一關一關、一步一步照路理來。原來，來參加考試的人攏tsam2然仔有水準，囡仔若報馬仔歡喜in的導師嘛來考。原來，台語的考試無想的遐簡單，予遮科技新貴的序大人看著無同款的台語。鐘仔聲一霆，阮這團「台語認證進香團」看起來膽膽。老師有交代：考試有可能聽無、雄雄袂記得彼字按怎讀、凡勢寫袂四序、嘛會懊惱講了脫槌。免驚！老師嘛同款會緊張會寫毋著，毋過我佇隔壁班佮恁同齊考，上重要的是學習過程中，咱攏真認真、用心去行的每一步。囡仔若食著定心丸，微微笑講in一定考過A級，欲共老師食予倒。

   「若準你真心想欲完成一層代誌，全世界攏會來共你鬥跤手。」大舌的阿薇、拄失去阿母的阿妤佮所有「i台語」的囡仔是我的老師，這陣囡仔教我「勇氣」愛按怎面對。親像苦揀仔舅三月發青葉、共坉底漚肥；秋分滿滿的黃金雨等待收成；十月中水紅仔色的結果享受拍拚過的美好；十一月結成咖啡色種子等待明年的春天。教台語十偌冬，這層代誌上有意義，雖然囡仔考試是上簡單的A級，不而過送予我的煞是A++滿滿的感動和享受教冊的快樂。「老師，咱明年去考B級hâ！我先注文啊哦！阮阿爸講伊嘛欲來考看覓咧！」你看！掖出去台語的種子佇這陣囡仔身上開始發穎展樹栽，等待另日仔成做勇身的樹欉繼續生湠、釘根。